Kinche ki Nchane no ki gɛ bee
Bamii ba duude ba chee bituŋ le, le bo ba fɛ kinche ki Nchane bo gɛ̀ ja Tikale kinchvu ki gɛ̀ bu kimbe ki juu sele yo bɛ ki juu saane yo le Kichiiŋ bo ja bo tu nshɛŋ yinɛ le. Gɛ bo bachii gɛ bi kichvu kinɛ le gɛ. Banfumɛ gɛ̀ ja Kfu chi Nfoŋ wu Kano le Kichiiŋ.
Chi woŋ chi le Achiaaŋ: Chi woŋ chi le Achiaaŋ le Banfumɛ, Kikanyi, Bɛkioo, Bebeŋ, bɛ Bechuŋe. Chi woŋ chi kɛme bikwɛɛ biboo gɛ mumu nyume a mumu kuu gɛ, nfoŋ wuchii kɛme we woŋ bɛ be ba kfuŋ, ba chɛ, mo ba chɛla. Bo kɛme tɛ Bvuŋga bvu kwifoŋ wu kɛme nfoŋ bɛ woŋ. Woŋ wumu kɛme nfoŋ nshɛŋ bɛ nfoŋ bala.
Kinche ki woŋ: Nchane kɛme kinche ki woŋ wuboo bo kɛme tɛ chi bine chi woŋ kwɛɛ le, chi bine chimi bine gɛh bilɛŋsɛ maa, chimi bekɛse maa, chimi muh wuchii, mwɛɛ munɛ le no mu ge bamii ba njiɛɛnyɛ koŋe mu.
Fiɛɛ fi Nchane fɛde: Nchane lɛne ŋɛɛ, bo gɛɛde nyaŋ, bo lade bvugomu, bo koode biɛŋ. Bo gee noo fɛ bo kɛme mwɛɛ munjile.
No jɛ yi Nyo gɛ̀ to: No jɛ yi Nyo gɛ̀ to kinche ki Nchane gɛ̀ kusɛ, njiiŋe wuyu le lɛ bo gɛ̀ kusɛ juu chi waaŋ wu fɛ Mbɛŋ wu ja Yuuŋ chi Nyo chi ba tɛŋe a jɛ yi bala le lɛ Sunde tu Satude gɛh a jɛ yi bala le gɛ̀ bee biluŋ 1965, Bamii ba gɛ̀ ge lɛ fi nyume noo gɛ̀ bee Nfoŋ Kikanyi bɛ Bikwɛɛ bi bintaashɛ bi Nyo. Nchane kɛme bambegɛ, bale, bikoo, agaaŋ.
No ba ghaade nfoŋ: Bii yi kinche ki Nchane le, gɛ nfoŋ too wu kwe gɛ, nfoŋ to wu la waaŋ kɛnɛ wu boh Kichiiŋ kɛnɛ wu gɛɛŋ ŋgɛnɛ wu le no wu gɛ kaasɛ gɛ. Gɛ ba to ba du lɛ nfoŋ le wu kwe gɛ, ba to ba du lɛ kite ki baaŋ le ki gwe, ŋgu le wu jimɛ, nfoŋ le wu boh kichiiŋ. Ba lɛɛse nfoŋ kijusɛ ki yeye le ba tɛŋe lɛ fuuŋ yeh, yeh yi yuuŋ le. Ba to ba ghaa nfoŋ fɛ wumu le wu lɛsɛ, kɛnɛ ajiŋ a kee bvusoo kɛnɛ ajiŋ a kiluŋ, gɛh no bamii ba la chiɛɛ le bo kɛmɛ kwa wuboo. Nfoŋ bude gɛh nyume a booŋ nfoŋ tɛnɛɛ, yi noo le bo mo bo shii kinshilɛ kiboo bo baa muh wu le wu ji kinta.
Juu chi ba gweeyi waaŋ, bamii bɛɛŋ mbegɛ le, baaŋ ayule, bo yege nɛ ŋgu le wu gwe a fuuŋ le, bo mo bo tuŋ chi ŋguji ki bo jaŋ lɛ ba le ba gweyɛ wa waaŋ. Ba jii waaŋ wu nfoŋ bimaa bitɛde , waaŋ wu kfuŋ bimaa bifɛɛ. Nɛ ba baaŋ a ghaa gɛ nfoŋ gɛ bo mo bo koo muh ba ghaa sege ba kwɛɛ kwa. Chi bine chi woŋ kwɛɛ le chichii la waaŋ wu nfoŋ kwɛɛ, gɛ noo gɛ tu chi chiɛɛ bine kwe cha.
Le la fi le fi ge fɛ ba laŋɛ lɛme chinɛ: Fɛ ŋkusɛ jɛ yi Nyo to, Jɛ yi Nyo Achiaaŋ gɛ bee fiɛɛ fi to lo a jɛ yi kituŋ le ki ba ge bamii ŋgvuune Nyo wu ntolo. Geenɛ jade no ŋkusɛ jɛ yi Nyo gɛ kɛ yi biluŋ le 2011, Jɛ yi Nyo yi ba kuse wa le yi kusɛ tɛ muntele mu bamii ba mbɛmɛ nshɛŋ yinɛ le. Kinche ki ba yuuse Nyo ba chee atɛnɛɛ a kinche ki woŋ, ba ka gɛɛne fɛ banyo le, le ki tu wɛɛ. Muh wuchii yuuse wa nyume Nyo mɛɛse bɛ nchiɛɛŋ. Muh wuchii koŋe ki wu kɛɛ Nyo, wu lɛme yi yɛyɛ we le. Ba le ba baŋ yeh yi muŋkuuŋ yimi, bamii bamu le bo noŋ banyo baboo ki bo bi bo yuuse Nyo Tada. Bikwɛɛ bi yeh yi muŋkuuŋ le, le bo leesɛ bikwɛɛ biboo ajoo bo tu booŋ ba Kletu njɛ kintaashɛ ki Base ki Kibbo. Jɛ yi Nyo yi ba kuse yinɛ le yi ge bamii ba duude bvuuse bikwɛɛ biboo bo nyaa Nyo Tada le. Mwa nfoŋ Afumɛ yɛyi ki wu tu muh wu Nyo mɛɛ. Ba bafɛɛ le wa bikɛse ba yuuse Nyo.
No bo yu jɛ Jiso a kinjiinyi ke le bɛ baŋgaŋ ba Jiso a jɛ yi Nchane le, mo baŋkee ba ba yɛɛne a jɛ yi Nchane le. Bamii le bo jɛmɛ mwɛɛ mu kuŋ bo le. Fi fimimia, le njɛmɛ wu mami Estha Ŋkiigɛ wu Akanyi, Wu gɛ sɛɛŋ lɛ “nɛ nle kwe abɛŋ, gɛ mɛ nyu lee ŋgu le gɛ,nje Nyo le wu jɛmɛ mɛnɛ ajɛ yi n'yuge chuule le. Mɛ ŋgɛ yu mɛ mbɛɛŋ, fi le fi nya mɛ chike bvushi bwaŋ le. Ŋkee bɛ nchiɛɛŋ lɛ nle gɛɛŋ yɛŋ Nyo le”.
Fɛ jɛ yi Nyo gɛ kɛ fo Achiaaŋ: Kintaashɛ ki Aloma gɛ kɛ Achiaaŋ yi biluŋ le 1919 Bo gɛ to bo shi Nfumɛ. Fada gɛ to wu jiŋɛ chuule wu yɛŋ lɛ Nfumɛ le atɛnɛɛ a woŋ wu Nchane. Bo gɛ tuŋ kitaŋ bɛ ata bɛ nshɛŋ nje bo gɛ fane lɛ ba le ba nyaa bo ŋgɛ bɛ kinche ki woŋ mo kigwɛɛŋ kɛnɛ kinjaŋ lee. Ba banyɛ bamii ba mbɛmɛ a kitaŋ kinɛ le. Ki ba yɛyi bo bo buunɛ bo gee ki mbɛmɛ kiboo lɛ ki kuu ki gɛɛne fwe fwe. Lɛ nyume noo, moŋ mo chi to fɛ bamii ba woŋ le bo kɛ bo gee gelɛ chi joŋe gɛ. Bo jaŋe bikɛse ba gɛ bee a kitaŋ ki yule, bo lade bo a kigwɛɛŋ le tɛ. Fada wu gɛ bee fo mo wu fɛ shɛŋ wo noŋ loŋ Banfumɛ le bɛ nshɛŋ yiboo le yi biluŋ le 1922. Wu ja wu boh wu tu Akanyi biluŋ le 1927 wu yee jɛ yi Nyo fo, too bude abɛŋ.
