To chuule, we a kikɛɛ ki Nchane gɛle mwɛɛ mu boo yo

Nchane  kɛme chi woŋ chi tɛŋ bɛ ba Nfoŋ ba tɛŋ, gɛ wumu bɛɛde wumu gɛ. Nɛ lɛ gɛ wumu nyume a wumu koo gɛ. Fi nteedɛ fi Nchane duu lɛ Nchane gɛ ja Kichiiŋ bɛ bamii bamu no chi woŋ chinɛ chichii gɛ ja Kichiiŋ chi le bimbe bi yanɛ le mo yi woŋ kfunɛ le wuchii. Geenɛ gɛ nyume bituŋ binɛ bichii bi gɛ ja kimbe kɛɛ le gɛ gɛh njɛ Banfumɛ bo gɛ bu nyume a kfuchii booŋ ba nfoŋ wu Kano le Kichiiŋ. Nshɛŋ yi Nchane yi joŋe yinɛ, kɛge a juu saane yo kijwe bɛ Bankoo mo Bajiiŋ, A kiwɛɛ kɛnɛ lɛ achiɛɛŋ bo kɛme kijwe bɛ Basaa. Ajuu sele yo kɛnɛ lɛ abikaa le bo kɛme kijwe bɛ Basaa bamu mo Begoŋ. Akoŋo bo kɛme kijwe bɛ Biboŋ. Nyo gɛ koŋ Nchane wu nooŋ kimbonɛ yeh yi boo le, Bo le bamii ba ŋgvuune Nyo  bo gɛɛde banchi.  Bo yuuse Nyo bo tɛ ka yuuse banyo, fi le lɛ bo kɛme tɛ mwɛɛ mumu mu bo ŋgvuune.

Nlɛɛŋ Mwɛɛ: Bo kɛme mwɛɛ munjile yeye yeye nje bifune, bikuu bi aku, Looko, bikoo bi bala, bisuuŋ, mbuuna, taashi bɛ munchoone, kfume,“mbaa yi bikame” nyaŋ, ŋwaŋwaŋ, bɛ mwɛɛ mumu mu nyaa kwa njɛ kofi. kakawu, ŋgone, nfuuŋ, bɛ asoŋ, wo tɛ taŋ mumu. ŋgɛlɛ nyaŋ le tɛ fiɛɛ fi shaŋ Achiaaŋ, nyaŋ njɛ banaa, bi mo shoŋ, muyuŋa bɛ shii. Ŋgɛlɛ nyaŋ le fiɛɛ fi tɛɛme fi le no muh gɛ chinɛ yu gɛ.

Je yi kwa:  Kijusɛ kinɛ kɛme waaŋ, bamii gude mwɛɛ ba bude yu bo ka lese bɛ mu, mo nyaŋ. Nchane ŋgvuune lo bo,  bo ka  biji fɛ bamii le. Mwɛɛ mu waaŋ duude Achiaaŋ, finɛ duunyi lɛ bamii ba koŋe waaŋ kɛme ki bo to Achiaaŋ. Mwɛɛ mu bikpwɛŋ fii yeh yu le njɛ mvushɛɛŋ, ata, kɛŋ, bɛ mbvuuŋ mo yuuŋ yi ba saaŋe yeh yu. Waaŋ fɛde bamii ba gude ba gese le.

Kikwɛɛ ki chɛ yi fɛ Mbɛŋ le yi nshɛŋ yi Nchane le, le ntɛ wu kuge bamii ba fo ja manjuu ma duude le bo jɛme jɛ yeye. Nɛ ki nyilɛ kifiɛɛ fi gee ŋgɛɛnɛ fwe bɛ nyuulɛ too chige chige nɛ.

Kintaashɛ ki bamii ba mbɛmɛ: Bintaashɛ le bi saaŋ woŋ wu Nchane le wuchii, Yi bituŋ bi Nchane le no ba taŋ Bintaashɛ bi ba le ba jooŋ, no ba gɛ taŋ bintaashɛ bi le yeh yi bamii le, bo laaŋe kwa kɛnɛ ba nya bo nje Nyo gɛ.

Chi bine: Bine chi woŋ chi bine gɛ nyu bilɛŋsɛ, chimi nyume yu nyu chi bikɛse chimi nyume yu chi bilɛŋsɛ bɛ bikɛse mo booŋ.

Chi wu woŋ bɛ kinche ki woŋ: Finɛ le fiɛɛ fi chimɛ wa gɛŋ woŋ wu Nchane le, Bvuŋga bvu gelɛ chimi chi kinche ki woŋ le ki lee wa yeh yi kighaaŋ kimi le wesee alaantɛŋ. Kinche ki woŋ ki ba bii munkuuŋ le, bɛ kinche kimi ki le atɛnɛɛ a mwɛɛ mu woŋ mu tɛme, bɛ buvŋga bvu woŋ bvu le chiaaŋ yi kwinfoŋ le. Finɛ bɛ mwɛɛ mu woŋ mumu fɛde kinche ki woŋ tɛɛme ki ka saane wvuuŋ. Njɛ Nfuh bɛ Samba, bvuŋga bvu jɛŋ le a kighaaŋ bo nyume bachɛ ba duunyi bo  no bo gee. Yi no le bvuŋga bvu woŋ le akighaaŋ bo nje kighaaŋ ki duude le ki gɛɛ kikwɛɛ yi mwɛɛ mu woŋ le. Gɛh nyume nje fiɛɛ fimi gɛ le gɛh nje mwɛɛ munjile bɛ mu mvuule le yu wesee. Ki ba fu mbvuuŋ gɛ nyume fiɛɛ fi mu tɛnyi gɛ.

Kinche kitɛɛme: Bamii ba yanɛ jode ŋgɛ baaŋ fɛ bo kɛme fiɛɛ fi bo lee fɛ jwe le. Gɛ fiɛɛ nyume yu yanɛ fi gee lɛ bamii kɛme kaba gɛ. Nɛ la fiɛɛ fi ge kighaaŋ ki yanɛ bu ki gɛɛŋ kfuuŋ ki ki gɛɛŋ ki gooŋ kaba.

Ki yɛyɛ ŋwa le fwee wu fiɛɛ fi chii, nyume fiɛɛ fi ba doŋse bamii ki bo yɛyɛ, le tɛ bvushɛ, bvu gɛ ba taaŋe gɛ. Yeh yi ŋwa wu moonu, ŋwa wu booŋ, ŋwa wu chuu bamii, ŋwa wu kuge, ŋwa wu kuge baaŋ ŋwa wu kuge wu yage lo, ba nyume ba booŋ majuu le majuuŋ le mbebe le mbebe le.