NAKUDA: Kintaasha kinɛ le ki ki le kimba ki Nchane bachii, Nchane kɛme Banfoŋ ba tɛŋ, binche bitɛŋ bɛ Binche bimi bifɛ, binche binɛ mo bi nyu bvusooshwi. Binche biyu le Kikanyi, Banfume. Bakibbo, Bebeŋ, Bɛ Bechughe, binche bimi bi bifɛ biɛɛ le Mboloo bɛ basoŋo.
Founding Secretary of NACUDA
NKADU: Kintaashɛ ki Kikanyi ki too bɛ ŋgɛɛnɛ fwe, le kintaashɛ ki Kikanyi lɛ woŋ wu Nchane le. Le nshɛn yi boo le yi chɛ yi fɛ Mbɛŋ kɛme fɛ bo jooŋ fo. Nchane kee bo nje gwenyɛ chiaaŋ yi boo ki bo’ fi bantolo, bo gɛ kɛmɛ nfoŋ wu boo wumu wu ji kinta kibaaŋ kibala, wu mo nyume gɛ njɛ kikwɛɛ ki chɛ yi woŋ yi shige. Wu gɛ kɛme Kikanyi fɛ shesŋ le fi fi gɛ ge fɛ bo yɛŋ yuu bɛ ŋgɛɛŋ fwe wu duude wunɛ le.
NFUCUDA: Kintaashɛ ki Banfume ki too bɛ ŋgɛɛnɛ fwe le kintaashɛ ki baŋe Banfume. Banfume le bamii ba chaase ye lɛ mwɛ mukuge bɛ mu tɛme muchii kɛge nyume Nfume kɛnɛ lɛ kɛge kfuu chi boo Banfume le bamii ba shaŋ Achiaaŋ, fi lɛ Nfoŋ wu boo le ŋkuse wu banfoŋ ba Achiaaŋ, wu le wu che wa yi kintaa le biluŋ mbaashɛŋ ncho bifɛ.
Kintaashɛ ki Bakioo ki too bɛ ŋgɛɛnɛ fwe kinɛ le kimba ki bamii ba Kibbo bachii, Bakioo banɛ le fo fɛ jɛ yi Nyo gɛ kɛ fo Achiaaŋ yanɛ. Bo kɛme nfoŋ wu boo baaŋ chumu, wu nyume wu yɛyɛ ŋwa wesee.
KIntaashɛ kinɛ le kimba ki baŋe Bebeŋ bachii bɛ ŋgɛɛnɛ fwe, le ki ki goone n’yuulɛ Abeŋ. Le Bebeŋ maa ba le abegɛ jiŋ wu nyile bo’ kibbo ki akoŋo le kɛnɛ bikaa le, bo kɛme nfoŋ wu nyume chumu, nyume mwa chiji. Yi kinche ki Nchane le le lɛ Nfoŋ Bibeŋ gɛ bee nfoŋ wu ŋkuse ki wu gɛɛŋ yeh yi kintaashɛ ki banfon le Bweya.
CHUCUDA: Kintaashɛ kinɛ le kiki nyume kimba ki Bechuuŋe, le ki ki kuse wa n’yuu to Chuŋe baaŋ. Mwɛɛ mu baaŋ baaŋ le Chuŋe mɛɛsee. Fiɛɛ fimimia fi ba kee le lɛ bo’ kɛme kinche ki bo’ chee muh le wu mumwa, nɛ fiɛɛ fi ge bo’ gha mwɛɛ mu tɛme mu tɛme mu too bvushi bvu boo le.
